Еркін күрестен Әлем чемпионы Нұрқожа Қайпановқа құрмет көрсетілді. Облыс әкімдігінде өткен салтанатты жиында балуанға жеңіл көліктің кілті табысталды. Ал чемпионның бапкері 3 млн теңге ақшалай сертификатқа ие болды.

Тиранадағы жаһандық жарыс Нұрқожа Қайпановтың есінен ешқашан шықпайды. Ол финалға дейінгі қарсыластарының барлығын қоғадай жапырды. Ақтық сында Жапонияның үкілеген үмітімен күш сынасты. Жаттықтырушылар дұрыс тактика таңдаған, ал физикалық дайындығы тамаша палуанымыз өзін психологиялық тұрғыда қайраған. Осы "ақылды" күресінің арқасында алтынға қол созды. Бөркін аспанға атпаған жанкүйер қалмады.

МАРАТ ТАСМАҒАНБЕТОВ, СҚО әкімінің бірінші орынбасары:

- Жарысқа 60-тан астам елден 300-ге жуық спортшы қатысты. Нұрқожаның жеңісі - үлкен жетістік! Баршаңызды аймақ басшысы Ғауез Нұрмұхамбетовтың атынан шын жүректен құттықтаймыз!

Ел мерейін асырған ұлға құрмет көрсету - ежелден келе жатқан дәстүр. Салтанатты шара барысында чемпионға облыс әкімінің бірінші орынбасары Марат Тасмағанбетов аймақ басшысының Құрмет грамотасы мен су жаңа темір тұлпардың кілтін табыс етті.

Әлем чемпионы атағы оңайлықпен келген жоқ. Соған жету үшін білекті жігіт жеңді де, жеңілді де. Қуаныш пен қайғыда Нұрқожаның қасында Сағындық Бейсембаев болды. Бүгінгі кездесуден палуанның жеке жаттықтырушысы құрқол кетпеді.

САҒЫНДЫҚ БЕЙСЕМБАЕВ, Нұрқожа Қайпановтың жеке жаттықтырушысы:

- Баршаңызға алғыс айтамын! Нұрқожадан кейін талай мықты палуан шығарына сенімдімін!

Нұрқожа - Петропавлдағы спорт-интернаттың түлегі. Білім ұясында бірнеше жыл оқыған. Сонда Сағындық Бейсембаевтың көзіне түсіпті. Бүгінде чемпион бапкерін арқа сүйер ағасындай, ақыл айтар әкесіндей көреді.

НҰРҚОЖА ҚАЙПАНОВ, еркін күрестен әлем чемпионы:

- Ағайым көп еңбек етті. Сол кісінің еңбегі зор, төгілген терді бағалаймын. Елімізді көк туымызды желбіретін чемпиондар көп болсын!

Қайта-қайта қошемет соғылған жиынға Нұрқожа Қайпановтың әкесі де қатысты. Азаматқа тарихи жетістікке жеткен ұлды өсіргені үшін Алғыс хат табысталды. Ал Бауыржан Құлжанов сияқты ел ағалары чемпионның жеке қасиеттерін айтып, құрметті қонақтың төбесін көкке жеткізді.