Облыстық телеарнаның тарихы сонау 1959 жылдан бастау алады. Дәл осы жылы облыстық халық депутаттары кеңесінің атқарушы комитеті Петропавлда телеорталық құру туралы шешім қабылдап, телемұнара мен орталық ғимаратының құрылысы басталған. Партияның облыстық комитетінің хатшысы Ілияс Омаровтың белсенділік танытуының арқасында бұл жұмыстар қарқын алып, 1960 жылдың 1-маусымында Петропавл телестудиясының алғашқы хабары эфирге шықты. Облыстық телеарнаның бастауында тұрған журналистер, операторлар мен режиссерлер түсірген Петропавл қаласы туралы тұңғыш фильм, 2-нші жылу-электр орталығының құрылысы, тың игерушілер, соғыс кезінде шаһарға көшірілген зауыт жұмысшылары, жергілікті өнер ұжымдары туралы ақ-қара таспадағы хроника қазір архивте сақтаулы. Алғашқы дикторлар: Жаңыл Аяпбергенова, Николай Бровкин, Валентина Малюкова, Валентина Бенюх, Халима Дауытова, Бүркіт Бекмағамбетов, Лев Соловьев, Валерий Гудков, Рахима Жұмабаева, Владимир Спиридонов.
1972 жылы алғашқы жылжымалы телевизиялық станция алынып, осы кезден көптеген айтулы оқиғаларды көрермен тікелей көрсетілім арқылы көру мүмкіндігіне ие болды. 80-ші жылдардың басында телеорталыққа жаңа техника, қондырғылармен жарақтандырылып, телеарна түрлі түсті бейнелеуге көшті. Петропавл хабарлары Қазтелерадионың хабар тарату жоспарына енгізіліп, республика бойынша көрсетіле бастады. 1985 жылы қазақ телевизиясының тарихында алғаш рет Петропавл телестудиясы ғарыш орбитасымен тікелей байланыс орнатты. Көрермендер көгілдір экран арқылы мыңдаған шақырым ғарыш кеңістігіндегі солтүстікқазақстандық ғарышкер Александр Викторенконы көру мүмкіндігіне ие болды.
1990 жылдары тарихта тоқырау кезеңі ретінде есте қалды. Ұжым нарықтық экономикаға бейімделіп, жаңаша жұмыс істеуге үйренді. Шығармашылық бірлестік негізінде жаңа коммерциялық топ құрылып, түрлі хабарлар жасай бастады.
1993-1997 жылдар аралығында облыстық телерадиокомпанияға Мүтәллап Мұхамадиұлы Қанғожин төрағалық етті. Осы жылдары ұмыт қалған халықтық мерекелер жаңғыртыла бастады. 1993 жылы еліміз жерлесіміз, ақиық ақын Мағжан Жұмабаевтың туғанына 100 жыл толуын атап өтті. Петропавлда және ақынның туған жері Сарытомар ауылында ескерткіш ашылып, үлкен той өткізілді. Петропавл телестудиясы 50 минуттық арнайы репортаж дайындап, оны спутниктік канал бойынша Алматыға жіберді, келесі күні ол бүкіл Қазақстан бойынша көрсетілді. Торқалы той арнайы алдырылған жаңа қондырғылардың көмегімен түсірілді.
1997 жылы Солтүстік Қазақстан облысына Көкшетау өңірінің кейбір аудандарының қосылуына, ол жердегі телестудияның жабылуына байланысты Петропавлға Кәрібай Мұсырман бастаған бір топ журналист келді. Сол жылы телеорталықтың ескі ғимаратын қайта қалпына келтіру жұмыстары жүргізілді.
2003 жылы Петропавл телестудиясында сантаңбалық телевизия дәуірі басталды. Ескірген жабдықтар түгелдей әлемдік деңгейдегі телевизиялық техника түрлерімен ауыстырылды.
2004 жылы Қазақстан-Петропавл телерадиокомпаниясы республика бойынша ұйымдастырылған телекөпір барысында алғаш рет Президентпен тікелей байланысқа шықты. Техникалық және шығармашылық сипаттама бойынша мемлекет басшысының солтүстікқазақстандықтармен диалогын ұйымдастырған студия мемлекет басшылығы тарапынан жоғары баға алды.
2008 жылы телестудиядағы жалпы алаңы 200 шаршы метрлік павильонының арнайы жарықтандыру құралдары тұтастай өзгертілді.
2009 жылы жылжымалы телевизия станциясы сатып алынды. Оның көмегімен Президенттің қатысуымен өтетін жалпыұлттық телекөпірлер, облыс аумағында өтетін маңызды оқиғалар мен мәдени, спорттық шараларды ақпараттық сүйемелдеу мүмкіндігі туды.
2010 жылы «Қазақстан-Петропавл» телеарнасы өзінің жарты ғасырлық, ал СҚО радиосы 80 жылдық торқалы мерейтойын атап өтті.
2015 жылы – «Қазақстан - Петропавл» телеарнасының интернеттегі ресми сайты іске қосылды
2017 жылы «Қазақстан» ұлттық арнасының ребрендингі аясында «Қазақстан-Петропавл» өз атауын «QYZYLJAR»-ға өзгертті. Бүгінде облыстық телеарна уақыт талабына сай дамып, өркендеп келеді.
Телеарна тәулігіне 14 сағат хабар таратады. Өз өнімі - 50%. Оның ішінде хабарлар – 32%, ақпарат - 32%. Ал киноөнім – 28,5%, жарнама – 0,5%, әлеуметтік роликтер - 7%. Бағдарламалардың 78% қазақ тілінде және 22% орыс тілінде жарыққа шығады.
Телеарна 9 құрылымдық бөлімнен тұрады. Дирекция, қаржы қызметі, коммерциялық кызмет, эфирді шығару бөлімі, редакторлық бөлім, режиссерлік бөлім, телеоператорлар бөлімі, техникалық бөлім, шаруашылық бөлімі.
Телеарна «Отау ТВ» ұлттық спутниктік операторы арқылы Қазақстан Республикасы аумағы бойынша - 100% хабар таратады, облыс бойынша цифрлық хабар тарату көлемі 98%, қала аумағында - 100%.
2018 жылы заманауи хабар тарату стандарты – 16/9 форматында жұмыс істей бастады. 2021 жылдың 1-ақпанынан цифрлық хабар тарату жүйесіне қосылды. Телеөндіріс форматы: 576i.
Телеарна контенті ресми сайт, Facebook, Instagram, YouTube, Telegram, ВКонтакте әлеуметтік желілерінде қолжетімді. qyzyljartv.kz сайты арқылы эфирді онлайн қарау мүмкіндігі бар.