Бүгінде Қазақстанда жаңа Конституция жобасын талқылау жалғасуда. Әсіресе аға буын өкілдерін толғандыратын негізгі сұрақтардың бірі – енгізілетін өзгерістер зейнетақы мен әлеуметтік кепілдіктерге қалай әсер етеді деген мәселе.
Құжат жобасына сәйкес, Қазақстан әлеуметтік мемлекет мәртебесін сақтап қалады. Бұл мемлекет көмекке мұқтаж азаматтарды, соның ішінде зейнеткерлерді қолдау міндетін өз мойнында қалдырады дегенді білдіреді. Зейнетақымен қамсыздандыру құқығы конституциялық деңгейде бекітілген күйінде сақталады. Әрбір азаматқа ең төменгі жалақы мен зейнетақы мөлшеріне құқық, сондай-ақ жасына байланысты, науқас немесе мүгедектік жағдайында әлеуметтік қамсыздандыру кепілдігі беріледі. Сонымен қатар мемлекет әлеуметтік қолдаудың түрлі нысандарын және қайырымдылықты дамытуға жәрдемдесуді міндетіне алады. Қоғам белсенділерінің пікірінше, мұндай нормалар әлеуметтік қорғау жүйесін нығайтып, қарт адамдар үшін қосымша қауіпсіздік кепілдіктерін қалыптастыруға мүмкіндік береді.
САЙРАН БАЙДАЛИНА, ТИМИРЯЗЕВ АУДАНЫ АРДАГЕРЛЕР КЕҢЕСІНІҢ ТӨРАЙЫМЫ