Петропавл әкімі Еңбек күніне орай ұйымдастырылған «Үздік шебер 2023» байқауының жеңімпаздарын марапаттады. Айта кетейік , бұл сайысқа тас қалаушы, аспаз, дәнекерлеуші, сантехник сынды түрлі саланың тұтқасын ұстаған жас мамандар қатысты.
«Үздік шебер - 2023» жыл сайын өтетін дәстүрлі байқау. Биыл аталған сайыс қаламыздың мәдениет үйінде әр сала шеберлерінің басын біріктірді. Салтанатты марапаттау рәсіміне қала әкімі Серік Мұхамедиев арнайы қатысты. Шаһар басшысының мәліметіне сүйенсек, осы жылы облыс орталығында 2 мың жаңа жұмыс орны ашылып, 3 мыңнан астам азамат тұрақты жұмыспен қамтылыпты.
СЕРІК МҰХАМЕДИЕВ, ПЕТРОПАВЛ ҚАЛАСЫНЫҢ ӘКІМІ:
Шаһарда «Үздік шебер» байқауы осымен бесінші рет өткізіліп отыр. Оның негізгі мақсаты - жұмысшы мамандықтарының мәртебесін көтеру. Аталған байқауға жас маман Владимир Сиринов қатысты. Сайыстың қорытындысы бойынша Владимирдің айы оңынан туып, «Ең үздік сантехник» номинациясының жеңімпазы атанды.
ВЛАДИМИР СИРИНОВ, «ЕҢ ҮЗДІК САНТЕХНИК» НОМИНАЦИЯСЫНЫҢ ЖЕҢІМПАЗЫ:
- «Мен Петропавл құрылыс-экономикалық колледжінің түлегімін. Колледжді тәмамдағаннан кейін «Зерттеу СК» серіктестігінде еңбек еттім. Қазір таңда өз-өзіме жұмыс істеймін. Өзімнің жұмысшыларым бар.»
Байқауда бірінші орын иеленгендердің қатарында Антон Оглобин бар. Ол ең «үздік дәнекерлеуші» номинациясының жеңімпазы. Айтуынша, әр адам өзінің жанына жақын мамандықты таңдауы тиіс, оның меңгеріп шыққан мамандығы тас қалаушы. Бірақ ол уақыт өте келе дәнекерлеуші боламын деп шешім қабылдаған. Сол себепті ол арнайы курсқа қатысқан.
АНТОН ОГЛОБИН, «ЕҢ ҮЗДІК ДӘНЕКЕРЛЕУШІ» НОМИНАЦИЯСЫНЫҢ ЖЕҢІМПАЗЫ:
- «Өзімнің мамандығыма көңілім толады. Бұрыннан бері жұмыс істеп келе жатырмын. Бірақ дипломым жоқ, арнайы курстарға қатысып дәнекерлеуші мамандығының қыр-сырын өзім үйрендім. Қазір мен өзімді бұқаралақ ақпарат құралдары арқылы жарнамалаймын, сол жерден маған тапсырыстар түсіп отырады. Жалпы алдағы уақытта осы сынды іс-шаралардың жиі өткізілуін қалар едім .»
Айта кетейік бұл байқаудың жалпы жүлде қоры 1 миллион теңге. Байқаудың жеңімпаздарына 100 мың теңге, екінші орын алғандарға 75 мың теңге, ал үшінші орын иеленген жандарға 50 мың теңгенің сертификаттары табыс етілді.