Облыс әкімінің бірінші орынбасары Марат Тасмағанбетов Петропавл көшелерінің тазалығын тексерді. Қардың қалың жаууына байланысты коммуналдық қызмет жолдарды тазалап үлгермей жатыр. Сол себепті жауапты компанияларға жұмысшы санын көбейтуді тапсырды.
Облыс орталығында қармен күрес қарқын алды. Бүгінде шаһарда жауапты жұмыспен 4 ұйым өкілдері бел жазбай айналысып жатыр. Олар түнге таман техника мен адам санын арттырып, таңға дейін тер төгеді.
Іске тартылған компаниялар өздеріне бекітілген аудандар бойынша жұмыс істейді. Мысалы, «Грандо» серіктестігі қаланың орталығына жауапты. Ұйым өкілдерінің аяқ алысымен кешкілік аймақ басшысының бірінші орынбасары Марат Тасмағанбетов арнайы барып танысты.
Марат Тасмағанбетов Кәрім Сүтішев көшесі бойымен жүріп өтті. Танысу барысында қала билігі мен компания басшысына жиектастарды күрекпен тазалайтын адам санын арттыруды тапсырды. Тағы бір маңызды жайт - көктайғаққа қарсы шараларды ұмытпау. Аялдамалардың маңына, жаяу жүргіншілер жолына құм-тұс қоспасы дер кезінде шашылуы тиіс.
МАРАТ ТАСМАҒАНБЕТОВ, СҚО әкімінің бірінші орынбасары:
Облыс әкімінің тапсырмасы бойынша қар тазалау және қар шығару жұмысымен танысып жүрміз. Петропавлды таза ұстау керек. Бұған жауапты компаниялардың күші жетеді. Бүгінде іспен 190-нан аса техника айналысуда. Қауырт кезең қарсаңында қала билігіне нақты тапсырма жүктелді. Көшелермен қатар, жаяу жүргіншілер жолдарын және жиектастарды үнемі ақ ұлпадан тазалау қажет. Мұны біз тексеріп отырамыз.
Ал «Благоустройство-Север» серіктестігі мамандары Мағжан Жұмабаев көшесі бойын тазалауда. Компания өкілдері тәулігіне 5-6 мың текше метр қар шығарады. Бүгінге дейін әжептәуір жұмыстың басын қайырған.
БОЛАТ БУХАНОВ, «Благоустройство-Север» ЖШС директоры:
-6 қараша күні жұмысымыз басталды. Бүгінге дейін 60 мың текше метрдей қар шығарылды.
Ал шаһардан шығарылған жалпы қардың көлемі 114 мың текше метрден асады. Жұмыспен танысу барысында облыс әкімінің бірінші орынбасары Марат Тасмағанбетов тұрғындарға жүгінді.
МАРАТ ТАСМАҒАНБЕТОВ, СҚО әкімінің бірінші орынбасары:
Бірсыпыра көлік иесі жылжымалы мүліктерін жол бойында қалдырып кетеді. Техника мамандардың жұмысына ауыз толтырып айтарлықтай кедергі келтіреді. Мұндай қиындық тудырмау үшін полиция департаментіне тиісті тапсырма берілді. Петропавлдықтарды жауапкершілік танытуға шақырамыз.
Алда қыстың негізгі айлары тұр. Көктемнің басында да үлкен көлемде ақ ұлпа түсуі мүмкін. Осы орайда синоптиктердің пікірін білдік. Олардың болжауынша жаңа жылға дейін өңірде аса көп қар жаумайды. Ал қаңтарда кейбір аудандарда көрсеткіш қалыпты нормадан асып түсуі ықтимал.