Өңірдің егін алқаптарында науқандық жұмыстар қызу жүріп жатыр. Биыл облыста 4,3 миллион гектар алқапқа дәнді және майлы дақылдар, көкөніс пен картоп егілді. Оның ішінде тек дәнді дақылдардың өзі – 3 миллион гектарға жуық. Диқандар қазіргі таңда өнімді жинауға кірісіп кетті.
180 гектар алқапқа дән еккен «Дайындық агро» серіктестігі егін жинау жұмыстарына кірісті. Өткен жылы шаруашылық Ресейден элиталық тұқым әкеліп еккен болатын. Қазір соның өнімін жинауда. Бас агроном Азамат Сағындықовтың айтуынша, биыл майлы дақылдарға басымдық берілген. Атап айтқанда, рапс, зығыр және жасымық егілген. Диқандар алқаптағы жұмысты қарқынды жүргізіп, науқанды уақытылы аяқтауды жоспарлап отыр.
СНХ:АЗАМАТ САҒЫНДЫҚОВ, «ДАЙЫНДЫҚ АГРО» ЖШС БАС АГРОНОМЫ
Сонымен қатар, 197 гектар алқапта сүрлемге арналған жүгеріні жинау жұмыстары қарқын алған. Егін орағын «Жарыс» ЖШС жүргізіп жатыр. Бұл шаруашылықтың агрономы Равиль Сұлтановтың айтуынша, биыл алқаптарға тыңайтқыш молынан енгізілген. Соның нәтижесінде өнімділік былтырғыдан жоғары болады деп болжанып отыр. Егін орағына барлығы 12 комбайн жұмылдырылған.
СНХ:РАВИЛЬ СҰЛТАНОВ, «ЖАРЫС» ЖШС АГРОНОМЫ
Осы күнге дейін облыста 415 мың гектардан дәнді және бұршақты дақыл жиналып, 600 мың тоннадан астам астық бастырылды. Жаңа өнімді жинауға 7 мыңнан астам комбайн, 12 мың трактор және 5 жарым мыңға жуық жүк көлігі жұмылдырылған. Сонымен қатар, 52 мың тонна элиталық тұқым себіліп, сұрып жаңарту көрсеткіші 11 пайыздан асты. Ал егін орағына арналған дизель отыны шаруаларға жеңілдетілген бағамен беріліп жатыр.