Биыл елімізде Жұмысшы мамандықтар жылы жарияланғаны белгілі. Осыған орай біздің редакция қарапайым еңбек адамдары туралы баяндауды жалғастырады. Мұндай мамандықтар аз емес. Соның бірі – ветеринар. Жануардың тілін сөзсіз түсінетін мамандардың еңбегі елеулі. Келесі бейнематериал кейіпкері – Мағжан Жұмабаев ауданына қарасты Лебяжье ауылында ветеринар болып жұмыс істейтін азамат.
Ағабек Талғат – Түркістан облысынан Мағжан Жұмабаев ауданына қоныс аударған. Бұл қадамға оны «Оңтүстіктен солтүстікке көш» бағдарламасы жетеледі. Мұхтар Әуезов атындағы Оңтүстік Қазақстан университетін тәмамдаған Ағабек – жүрек қалауымен ветеринар мамандығын таңдаған жан. Бүгінде Лебяжье ауылында еңбек етіп, жануарларға дер кезінде көмек көрсетіп жүр.
СНХ:АҒАБЕК ТАЛҒАТ – ВЕТЕРИНАР ДӘРІГЕР
Ағабек жаңа ортаға тез бейімделді. Оның айтуынша, жергілікті халық өте қонақжай. Сонымен қатар, Солтүстік Қазақстанның көркем табиғаты да жас маманды бірден баурап алған.
СНХ:АҒАБЕК ТАЛҒАТ – ВЕТЕРИНАР ДӘРІГЕР
Ағабектің айтуынша, Солтүстік Қазақстан облысында қоныс аударушыларға барлық жағдай жасалған. Оның жұмыс кабинеті қажетті құрал-жабдықтармен толық қамтамасыз етілген. Жас маманның міндетіне малды емдеумен қатар, ветеринарлық анықтамалар мен төлқұжаттар беру, сондай-ақ ауыл шаруашылығы жануарларына қатысты деректерді нақтылау да кіреді.
СНХ:ЕВГЕНИЯ БУНКОВСКАЯ, ВЕТЕРИНАР ДӘРІГЕР
Ағабек ауыл тұрғындарының шақыртуына қызметтік көлікпен барып, ветеринарлық көмек көрсетеді. Біздің түсірілім тобы оның малдан қан алу барысына куә болды. Алынған үлгілер арнайы зертханаға жолданып, мал арасында жұқпалы аурулардың бар-жоғы тексеріледі.
Жалпы қай кезде болсын сарып, аусыл, Сібір жарасы секілді басқа да кеселден төрт түлікті аман сақтау, халықтың денсаулығына зиян тигізбеу маңызды мәселе. Бұл тұрғыда мал дәрігерлерінің атқарар еңбегі айрықша. Сондықтан да осы істің басы-қасында жүретін білікті мал дәрігерлері жеткілікті болуы шарт және ветеринария саласында кадр үздіксіз даярлануы керек.