Назарбаев Зияткерлік мектептеріне-15 жыл. Осыған орай, Петропавлдағы NIS-те ұстаздар арасында республикалық “Қос Аңыз” пікірсайыс турнирі ұйымдастырылды. Іс-шараға еліміздің түкпір-түкпірінен келген 12 құрама қатысты. Дебатшы мұғалімдер білім беру саласындағы және қоғамдағы өзекті мәселелерді ортаға салып, қызу пікірталас өткізді.
Бүгінде пікірсайыс қозғалысы мектеп оқушыларының арасында жақсы дамыған. Оқушылар облыстық, республикалық сайыстарға үнемі қатысып отырады. Дегенмен балаларды осы сайыстарға әзірлейтін ұстаздардың арасында бұндай жарыстар жоқтың қасы. Сондықтан, Петропавлдық NIS-те алғаш рет мұғалімдер арасында сайыс ұйымдастырылды.
БАҚЫТЖАН ТҰРСЫНОВ, НАЗАРБАЕВ ЗИЯТКЕРЛІК МЕКТЕБІНІҢ ҚАЗАҚ ТІЛІ МЕН ӘДЕБИЕТІ ПӘНІ МҰҒАЛІМІ:
- Ұстаздардың арасында тәжірибе алмасудың маңызы өте зор. Өйткені бұл қозғалыс оқушылардың ортасында кеңінен танымал. Сондықтан форматтың біріңғайлығын қамтамасыз етіп, ортақ тақырыптар, шәкірттерге нені үйрету керектігі, ұтымды тұстары қандай екенін көрсету үшін ұстаздарды үйрету мақсатында, екіншіден, мұғалімдердің ораторлық шеберліктерін шыңдау үшін алғаш рет осы “Қос Аңыз” пікірсайыс турнирін ұйымдастырдық.
Екі күн бойы облыс аудандарынан, Астана, Павлодар, Семей, Қостанай Көкшетау қалаларынан және Ұлытау облысынан келген мұғалімдер білім беру саласының, қоғамның өзекті проблемаларын ортаға салып, өзара талқылап, шешу жолдарын ұсынды. Семей қаласынан келген Данияр Кемешев дебатқа студенттік шағында-ақ бет бұрған екен.
ДАНИЯР КЕМЕШОВ, СЕМЕЙ ҚАЛАСЫНДАҒЫ НАЗАРБАЕВ ЗИЯТКЕРЛІК МЕКТЕБІНІҢ ТАРИХ ПӘНІ МҰҒАЛІМІ:
- Мұғалімдер арасында да пікірсайыс турнирлері өтсе екен деп бұрыннан армандайтынбыз. Сол арманымыз Петропавлда жүзеге асқанына қуаныштымыз. Өйткені оқушыларды осындай сайыстарға әзірлейтін мұғалімдердің өздерінде сайыстың форматы жайлы түсінік болуы керек, сыни ойлай алуы керек. Оны оқушыларға түсундіру үшін, тәжірибе жинақтау үшін осы турнирдің маңызы зор деп айтар едім.
Ал, Ұлытаулық Дархан Есенбаев дебатқа алғаш рет қатысып отыр. Білім саласына 4 жыл бұрын қосылған маман алдағы уақытта бұл іспен мықтап айналыспақшы.
ДАРХАН ЕСЕНБАЕВ, №15 ТІРЕК МЕКТЕБІНІНІҢ ТАРИХ ПӘНІ МҰҒАЛІМІ, ҰЛЫТАУ ОБЛЫСЫ:
- Небір мықты мамандар келген екен. Бұл – таным көкжиегімді кеңейтіп, тәжірибемізді бөлісіп, тәжірибе жинап, кейін оны оқушыларыма үйретуге керемет мүмкіндік. Бұрын өзім дебатқа аса қызыға қоймайтынмын. Өйткені қелген тақырыпқа байланысты, өзіңе ұнамай тұрған жақты қолдап, сөйлеуге қарсы болатынмын. Бүгін қызу дебатты көріп, бір сәуле ғайыптан пайда болды. Енді сол сәуелінің жетегінде жүріп, ұлт болашағын тәрбиелесек деген ниетіміз бар.
Турнир британдық парламент форматында қомандалық сайыс және Линкольн-Дуглас форматында жеке спикерлердің сайысы түрінде ұйымдастырылды. “Үздік спикер” атағын қостанайлық Дастан Қалиев жеңіп алды. Құрамалар арасында үшінші орынға “Павлодар А” командасы тұрақтады. Екінші және бірінші орындар бұл жолы Қостанай қаласының “Амангелді тарландары” және “Парасат майданы” құрамаларының дебатшыларына бұйырды. Жүлдегерлерге ақшалай сыйлықтар табысталды. Алдағы уақытта бұл турнир Назарбаев Зияткерлік мектептерінде қазақ, орыс және ағылшын лигаларында дәстүрлі түрде өткізіліп тұрмақ.