Назар аударыңыз-көктайғақ!
Қыс мезгіліндегі көктайғақ жол-көлік оқиғаларының басты себептерінің бірі. Осындай қолайсыз жағдайға байланысты Солтүстік Қазақстан облысында «Қауіпсіз жол! Назар аударыңыз-көктайғақ!» деп аталатын ауқымды профилактикалық акция басталды. Оның мақсаты жол-көлік оқиғаларының алдын алу және тұрғындарға қарапайым қауіпсіздік ережелерін еске салу.
Акция Солтүстік Қазақстан облысы прокуратурасының бастамасымен қолға алынған. Іс-шараны әкімдік және Полиция департаменті бірлесіп ұйымдастыруда. Профилактикалық жұмыстар жол-көлік оқиғалары жиі орын алатын учаскелерде, жаяу жүргіншілер өткелдерінде, қоғамдық көлік аялдамаларында және білім беру ұйымдарының маңында жүргізілуде.
СНХ: АЛМАС АСАИНОВ, СҚО ПРОКУРАТУРАСЫ ҚОҒАМДЫҚ МҮДДЕЛЕРДІ ҚОРҒАУ БАСҚАРМАСЫНЫҢ АҒА ПРОКУРОРЫ
Акция барысында қысқы көктайғақ кезінде жол-көлік оқиғаларының алдын алуға ерекше көңіл бөлінеді. Мамандар жүргізушілерге ақпараттық парақшалар таратып, жылдамдықты сақтаудың, қысқы шиналарды пайдаланудың және жарықшағылдырғыш элементтерді қолданудың маңызын түсіндіруде.
«Қауіпсіз жол! Назар аударыңыз-көктайғақ!» акциясы Солтүстік Қазақстан облысының барлық аудандарында өтуде. Полиция қызметкерлері жүргізушілер мен жаяу жүргіншілерді жол қозғалысы ережелерін қатаң сақтауға, мұқият болуға және жолдағы қауіпсіздіктің бәрімізге ортақ жауапкершілік екенін ұмытпауға шақырады.