Тұрақтандыру қорында 12 мың тоннаға жуық өнім бар

Өңірдегі тұрақтандыру қорында қазіргі уақытта 12 мың тоннаға жуық өнім бар. Әлеуметтік маңызы бар азық-түліктің басым бөлігі – жергілікті тауар өндірушілердің өнімі. Қорды толықтыруға биыл облыстық бюджеттен 2,5 млрд. теңге бөлінді.

«Солтүстік» әлеуметтік-кәсіпкерлік корпорациясының тұрақтандыру қорына әлеуметтік маңызы бар азық-түліктің 14-і енген. Қыс мезгілінде көкөністер «Радуга» ЖШС заманауи көкөніс қоймасында сақталынады. Нысанда көкөністерді мамыр-маусымға дейін бұзбай жеткізуге мүмкіндік беретін қажетті жағдай, соның ішінде температура, желдету бар. Облыста өндірілмейтін қант, күріш және тұзды қоспағанда, қалғаны жергілікті кәсіпкерлердің өнімі. Азық-түлік қоймалардан тұрақтандыру қорының сауда орындарына күн сайын, супермаркеттерге – аптасына үш рет жеткізіледі. Тұрақтандыру қорымен ауылдық дүкендер де жұмыс істейді. Өтінімдерді аудандардағы кәсіпкерлік бөлімдері қабылдайды.

ГАМАЛИ ЖҰМАШОВ , "СОЛТҮСТІК" ӘКП " АҚ БАСҚАРМА ТӨРАҒАСЫНЫҢ ОРЫНБАСАРЫ:

 - 11,7 мың тонна өнім, 5 млн. данадан астам жұмыртқа сатып алынды. Атап айтқанда, 1 247 тонна картоп, 450 тонна пияз, 470 тонна қырыққабат, 477 тонна сәбіз сатып алынды. Сондай-ақ 4,5 мың тонна бидай ұны сатып алынды. Тұрақтандыру қорының өнімдері облыс орталығының барлық дүкендерінде және аудандардың дүкендерінде сатылады.