Осыдан 2 жыл бұрын мемлекет басшысының тапсырмасы аясында М.Қозыбаев атындағы СҚУ-і АҚШ-тың жетекші Аризона университетімен серіктестік орнатты. Нәтижесінде қос дипломды білім беру бағдарламасы іске қосылды. Бүгінде мұнда IT, биотехнология және инклюзивті білім беру бағыттары бойынша мамандар даярланады. Бұл туралы өңірлік коммуникациялар қызметі алаңында айтылды.
Бұл бағдарлама аясында университет студенттері 4 жыл ішінде 2 диплом алып шығады. Ал оларға дәрісті АҚШ, Түркия сияқты елдердің профессорлары ағылшын тілінде оқиды. Оқу барысында шетелде тәжірибеден өтуге де мүмкіндік бар.
ЕРБОЛ ИСАҚАЕВ, М.ҚОЗЫБАЕВ АТЫНДАҒЫ СҚУ БАСҚАРМА ТӨРАҒАСЫ-РЕКТОР:
- 2025 жылы 40 студент Аризона университетінің Тусон қаласында орналасқан негізгі кампусына барады. Оқу, тұру, ұшу, виза, тамақтануға байланысты барлық шығындарды Қозыбаев университеті өтейді. Студенттерге алдын ала виза алынып, әуе билеттері сатып алынады.
Аризона университетімен бірлескен халықаралық бағдарламалар біздің студенттер үшін қол жетімді. Мұнда оқу қазақ, орыс, ағылшын тілдерінде жүргізіледі. Ал Халықаралық бағдарламалар 11 бағыт бойынша жүзеге асырылады.
ЕРБОЛ ИСАҚАЕВ, М.ҚОЗЫБАЕВ АТЫНДАҒЫ СҚУ БАСҚАРМА ТӨРАҒАСЫ-РЕКТОР:
- Алдағы 3 жылда қос дипломды 3 жаңа білім беру бағдарламасы ашылады: «Бизнес және менеджмент», «Жалпы медицина» және «Су ресурстары». Бұл білім беру бағдарламаларына қатысушылардың саны кемінде 1500 адам болмақ. Барлығы қос дипломдық 10бағдарлама ашу жоспарланған.
Қазіргі уақытта қос дипломдық бағдарлама бойынша университетте мыңнан астам студент білім алып жатыр, оның ішінде шетелдіктер де бар.