Биыл Қазақстан халқы ел тәуелсіздігінің тірегі саналатын – Ата Заңымыздың қабылданғанына 30 жыл толуын атап өтуде. Айтулы мереке қарсаңында Солтүстік Қазақстан облысының полиция департаменті «Qyzyljar Creative Center»-де салтанатты іс-шара ұйымдастырды. Онда ел тыныштығын күзетіп жүрген тәртіп сақшылары марапатталып, олардың еңбегі лайықты бағасын алды.
Салтанатты жиынға облыс басшылығы, ішкі істер органдарының ардагерлері, полицияның бүгінгі буыны, сондай-ақ қоғамдық және жастар ұйымдарының өкілдері қатысты. Сахна төріне көтерілген Солтүстік Қазақстан облысы полиция департаментінің бастығы өз сөзінде мемлекет тарапынан полиция қызметіне ерекше көңіл бөлініп отырғанын атап өтті. Сонымен қатар жеке құрамды Конституция күнімен құттықтап, адал қызметі, кәсібіне беріктігі және қоғамдық тәртіпті қамтамасыз етудегі еңбектері үшін алғыс білдірді.
Осы күні бірқатар қызметкерлер Ішкі істер министрлігінің және облыс әкімінің марапаттарына ие болды. Жиын барысында ел тыныштығы жолында аянбай еңбек етіп жүрген полиция қызметкерлерінің ерлігі де ерекше атап өтілді.
СНХ:РУСЛАН ТАСИМОВ — СҚО ПД ЖЕКЕ ҚҰРАММЕН ЖҰМЫС БАСҚАРМАСЫНЫҢ БАСТЫҒЫ
Басқарма полиция қызметкерлерінің саптық, атыс даярлығын, сондай-ақ дағдарыс жағдайларындағы іс-қимылдарды үйретуді ұйымдастыруға жауапты аға инспектор Ерлан Қазиев еңбек демалысында жүргеніне қарамастан, ерлік көрсетті. Ол Новоишим ауылындағы жағажайда суға батып бара жатқан екі адамды құтқарып қалды. Бұл оқиға көпшілікке бірден белгілі болған жоқ, өйткені қарапайым полицей өз ерлігін жария етуді қаламаған. 2007 жылдан бері ішкі істер органдарында қызмет етіп келе жатқан Ерлан Қазиев әріптестері арасында адалдығымен, жауапкершілігімен және кәсіби біліктілігімен үлгі болып келеді. Оның айтуынша, полиция қызметкерінің басты міндеті – сын сағатта дұрыс шешім қабылдап, жас мамандарға іс жүзінде үлгі көрсету.
СНХ:ЕРЛАН ҚАЗИЕВ – СҚО ДП АРНАЙЫ ЖӘНЕ ЖҰМЫЛДЫРУ ДАЯРЛЫҒЫ БАСҚАРМАСЫНЫҢ АҒА ИНСПЕКТОРЫ
Салтанатты жиын барысында батыр полицейдің ата-анасы да назардан тыс қалмай, оларға алғыс хат табысталды.