Облыс орталығындағы жекеменшік кәсіпорындардың бірінің жұмысшылары таңертең келгенде кеңсенің терезесі ашық тұрғанын, ал сейфтің бұзылғанын байқап оқиға орнына бірден полиция шақырады.
Бұзылған сейфтің ішінде тағы бір шағын сейф болған. Қаскөйлер оны өздерімен бірге алып кеткен. Келтірілген шығын 4,5 миллион теңгеден асады. Жедел іздестіру барысында полиция қызметкерлері түн ортасында 50 жастағы қала тұрғынын ұстады. Жеке кәсіпкердің жұмысшылары оны бірден таныды. Ер адам бұған дейін кеңсенің кіре беріс есігіндегі құлыпты ауыстырған болып шықты.
Қазіргі уақытта аталмыш факті бойынша қылмыстық іс қозғалып тергеу жұмыстары басталды. Ұрланған ақшаның бір бөлігі тәркіленді, қалған қайда кеткені анықталып жатыр. Күдікті қамауға алынды. Қызметтiк үй-жайға заңсыз кiру арқылы жасалған ұрлық үшін қаскөй 5 жылдан 10 жылға дейін бас бостандығынан айырылуы мүмкін.