«Динамо» қоғамы облыстық филиалының спорт залында кішкентай «динамошылар» үшін спорттық мереке өтті. Оған дене шынықтыру-спорт қоғамында шағын футболмен айналысатын 5 жастан 12 жасқа дейінгі 52 ұл мен 3 қыз қатысты. Ұйымдастырушылар спорттық іс-шараҒА әсем шыршамен КӨРІК беріп, Аяз Ата мен Ақшақарды шақырды. Балалар тақпақ айтып, жұмбақтар шешті. Барлық қатысушыларға «Динамо» спорт қоғамы мен демеушілерден сыйлықтар берілді. Сонымен қатар, жыл қорытындысы бойынша жаттықтырушылар ұжымы таңдаған кіші топтардағы үздік ойыншылар арнайы сыйлықтармен марапатталды. Іс-шараға солтүстікқазақстандық «Қызылжар» командасының кәсіби футболшысы Тимур Мульдинов арнайы келіп балаларды құттықтады, сыйлықтарын табыс етті. Өз кезегінде ата-аналар да ұйымдастырушыларға спорттық мереке үшін, балаларға көңіл бөліп, салауматты өмір салтын ұстануға қамқорлық жасағаны үшін алғыс білдірді.