Ауа райының күрт өзгеруіне байланысты өңірде дауылды ескерту жарияланды. Қазгидромет респбликалық мемлекеттік кәсіпорны облыстық филиалының мәліметінше, осы күндері жаңбыр, қар, боран және -10 градусқа дейін суық, көктайғақ болады. Осыған байланысты облыстың төтенше жағдайлар департаменті тұрғындарды қауіпсіздік шараларын сақтауға шақырды.
Өңірге қыс келді. Тұрғындар ауа райының қолайсыз жағдайларына дайын болуы қажет. Облыстың төтенше жағдайлар департаменті алыс сапарлардан уақытша бас тартып, мүмкіндігінше үйде болуды ескертеді.
АСЛАН АХМЕТЖАНОВ, СҚО ТЖД БАСҚАРМАСЫНЫҢ БАСТЫҒЫ
- Облыстық ТЖД елді мекендерден тыс жерлерге сапарларды кейінге қалдыруды, сондай-ақ автокөлікпен алыс жолға шығуды шектеуді ескертеді. Балық аулау мен аңшылыққа шығудан да бас тартқан жөн. Балалардың көшеде жүруін қадағалап, тайғақ жолдарда жарақат алмау үшін сақтықпен жүру керек.
СҚО ТЖД пешпен жылыту және электр құрылғыларын пайдалануда өрт қауіпсіздігі ережелерін сақтау маңызды екенін де ескертеді. Қыс мезгілінде жеке үйлердегі өрттің негізгі себептерінің бірі — жылу құрылғыларын дұрыс пайдаланбау.
АСЛАН АХМЕТЖАНОВ, СҚО ТЖД БАСҚАРМАСЫНЫҢ БАСТЫҒЫ:
- Пешті, электр және газ құралдарын пайдаланғанда өрт қауіпсіздігі ережелерін сақтаудың маңыздылығын ескертеміз. Сондай-ақ, егер сіз төтенше жағдайға тап болсаңыз немесе жолда кептелісте қалып қойсаңыз, 112 нөміріне қоңырау шалып, болған жағдайды және орналасқан жеріңізді хабарлай аласыз.
Мамандар сондай-ақ ауа райына қатысты хабарламаларға да мән беріп, ескертулерге құлақ асуға кеңес береді.