Петропавл қаласы маңында Есіл өзені тасып жатыр. 1 сәуір күні су деңгейінің көтерілуіне байланысты халықаралық маңыздағы «Челябі-Новосібір» тас жолының учаскесін су басты. Салдарынан сағат 22.00-ден бастап бұл жерден өтуге көліктің барлық түріне шектеу қойылды.
Бұл маусымдық су тасқыны кезінде жыл сайын қайталанатын жағдай. Жол қауіпсіздігін қамтамасыз ету үшін мұнда арнайы белгілер мен сигналдық бағандар орнатылып, тәулік бойы кезекшілік ұйымдастырылды. Жүргізушілер үшін балама бағыттар белгіленді. Жеңіл көліктер Петропавл қаласы арқылы өте алады, ал жүк көліктері «Петерфельд-Архангельское-Новокаменка» жолын пайдаланып, «Жезқазған – Петропавловск» республикалық трассасына шығуы қажет. Синоптиктердің хабарлауынша, алдағы күндері Есіл өзеніндегі су деңгейі одан әрі көтерілуі мүмкін. Сондықтан жүргізушілерге жолдағы өзгерістерді қадағалап, қауіпсіздік шараларын сақтауға кеңес беріледі.