Өңірдің түгін тартсаң майы шығатын құнарлы қара топырағы егіншілік пен мал шаруашылығымен айналысуға қолайлы. Оны ұтымды пайдаланып отырған шаруашылықтар аз емес. Солардың бірі - Мамлют ауданындағы Андреевка елді мекенінде орналасқан «Арқалық» шаруа қожалығы. Олар ата кәсіп, жылқы өсіру мен қымыз өндірісін қатар алып келе жатқан іргелі кәсіпорын. Олай деуге себеп шаруашылық жаз мезгілінде тәулігіне 1000 литрге дейін қымыз әзірлейді.
Қымыз өндірісі дәстүрлі қазақ мәдениетінің ажырамас бөлігі. Бұл өнімнің тарихы терең, әрі қазақ халқының мал шаруашылығымен тығыз байланысты. Қымыз – бие сүтінен алынатын ферменттелген, өзіндік тәтті-қышқылтым дәмі мен пайдалы қасиеттерімен танымал.
СНХ: НАҒАШЫБАЙ БАРЛЫБАЕВ – ҚОЖАЛЫҚ БАСШЫСЫ
Қожалықтың жылқыға қажетті жем-шөп өсіретін алқабы, шабындығы, жазғы жайылым мен қысқы тебіндік жерлері жетерлік. Ал ондағы жылқы басы қазір 450-ге жеткен.
СНХ: АЙДОС ӘБІЛОВ – ШАРУАШЫЛЫҚТЫҢ БАС АГРОНОМЫ
Аталмыш шаруашылық 1997 жылы құрылған. Қазіргі күні ондағы сауын биелерінің басы 200. Қыс мезгілінде олардың елуі әр 1,5 сағат сайын сауылады. Жабық нысанға қойылған «Тандем» атты екі қанаттан тұратын мына қондырғы бір мезетте 8 бие саууға мүмкіндік береді. Жұмыстардың барлығы автоматтандырылған.
Фермада жиналған саумал әзірге әр сағат сайын қымыз дайындау цехына жеткізіліп отырады. Шағын ауылда дайындалатын дәмі тіл үйіретін бал қымыз тек жергілікті адамдар арасында ғана емес, жалпы өңір халқы мен Ақмола облысы мен Астана қаласы тұрғындарына да жақсы таныс.
СНХ: МАРАЛ ГАФИУЛЛИНА – ЦЕХ БРИГАДИРІ
Құрылғанына 30 жылға жуықтаған шаруашылықтың басты мақсаты,– қазақ халқының дәстүрлі сусындарын жаңғырту. Өнімге сұраныс бар. Сондықтан мұндағы қымыз өндірісі жыл бойына үздіксіз жүргізіледі.